လေ့ကျင့်ခန်း မလုပ်ခင် ဘာလို့ အရင်ဆုံး အကြောလျှော့ သင့်တာလဲ
Gym သွားပြီဆိုရင် လေ့ကျင့်ခန်းမလုပ်ခင် နည်းပြဆရာတွေကိုယ်တိုင် အကြောလျှော့ပေးပြီးမှ စလုပ်ဖို့ ပြောသံတွေ ကြားဖူးမယ်ထင်ပါတယ်။ ကိုယ်တိုင် အိမ်အနီးအနားမှာ လမ်းလျှောက်မယ်၊ ပြေးမယ်၊ ကိုယ်လက်လှုပ်ရှားမှု လုပ်မယ်ဆိုရင်တောင် အကြောလေးပြေသွားအောင် အရင် အကြောလျှော့ပြီးမှပဲ လုပ်စရာရှိတာ ဆက်လုပ်တတ်ကြတာမလား။
တကယ်တော့ လူတွေသိပ်အရေးမကြီးဘူးလို့ ထင်ထားတဲ့ အကြောလျှော့လေ့ကျင့်ခန်းဟာ ကိုယ့်ရဲ့ ကိုယ်လက်လှုပ်ရှားမှု၊ လေ့ကျင့်ခန်းလုပ်ရာမှာ တကယ်လိုအပ်သလို တခြားအကျိုးကျေးဇူးတွေလည်း ပေးနိုင်ပါတယ်။
အကြောလျှော့လေ့ကျင့်ခန်းရဲ့ အကျိုးကျေးဇူးတွေ
၁။ နေ့စဉ်ပုံမှန် အကြောလျှော့ပေးခြင်းဟာ ခန္ဓာကိုယ်ကြွက်သားတွေကို ပျော့ပျောင်းပြီး Flexible ဖြစ်စေတယ်။ ဒီအခါ လေ့ကျင့်ခန်းလုပ်တဲ့အခါ ကြွက်သားတင်းမာမှု သိပ်မရှိတော့တဲ့အတွက် လူကို ပိုပြီးသက်သောင့်သက်သာဖြစ်စေသလို ထိခိုက်နာကျင်မှုကိုလည်း လျော့နည်းစေတယ်။
၂။ လူကို ပိုမိုပေါ့ပါးလန်းဆန်းစေပြီး အားကစား၊ လေ့ကျင့်ခန်းလုပ်တဲ့အခါ အားအင်ပိုမို စိုက်ထုတ်လာနိုင်စေပြီး ခြေလက်တွေကို ညောင်းညာကိုက်ခဲမှုကင်းစွာနဲ့ ဆန့်ထုတ်နိုင်စေတယ်။ အမောလည်း ပိုခံနိုင်ပြီး သက်လုံပိုကောင်းလာစေပါတယ်။
၃။ ခန္ဓာကိုယ်တွင်း သွေးလည်ပတ်စီးဆင်းနှုန်းကို မြန်စေတဲ့အတွက် ကယ်လိုရီလောင်ကျွမ်းတဲ့နေရာမှာလည်း ကူညီပေးတယ်။ ဒါ့အပြင် လေ့ကျင့်ခန်း၊ အားကစားမလုပ်ခင်မှာ Stretching ကြိုတင်လုပ်ခြင်းဖြင့် ခန္ဓာကိုယ်ကို ပိုမို Alert ဖြစ်စေပြီး ကိုယ်လက်လှုပ်ရှားမှုလုပ်တဲ့အခါ ခန္ဓာကိုယ်အတွက် အဆင်သင့်ပိုဖြစ်စေပါတယ်။
၄။ အကြောလျှော့ခြင်းဟာ ခြေ၊ လက်တွေကို ပိုမိုဆန့်တန်းစေပြီး ကုန်းနေ၊ ကွေးနေ၊ ပုံသဏ္ဍာန်မမှန်ဖြစ်နေတဲ့ အရိုးအဆစ်တွေကို ပြေလျော့စေတဲ့အတွက် ကိုယ့်ရဲ့ ခန္ဓာကိုယ်အချိုးအစားကို ပိုမိုကြည့်ကောင်းလာစေပြီး ရှူနာရှိုက်ကုန်းဖြစ်တဲ့ ပြဿနာကိုလည်း ကူညီဖြေရှင်းပေးနိုင်ပါတယ်။
၅။ လူတစ်ယောက် ညအိပ်တဲ့အခါ ကြွက်သားတွေတင်းမာနေရင် လူကသက်သောင့်သက်သာမဖြစ်ဘဲ အိပ်ဖို့ပိုခက်ပါတယ်။ အကြောလျှော့ခြင်းဟာ ကြွက်သားနဲ့ အရိုးအဆစ်တင်းမာနေတာတွေကို ပြေလျော့စေတာကြောင့် ညဘက်မှာ ကောင်းစွာအိပ်ပျော်နိုင်စေဖို့ ကူညီပေးနိုင်ပါတယ်။
၆။ အကြောလျှော့ခြင်းဟာလည်း လေ့ကျင့်ခန်းတစ်ခုဖြစ်တာကြောင့် ကိုယ့်ရဲ့အာရုံစူးစိုက်နိုင်စွမ်းကို အားကောင်းစေပြီး စိတ်ဖိစီးမှုတွေ၊ စိတ်ညစ်စရာတွေ၊ အတွေးလွန်နေတာတွေ၊ စိတ်ဆိုးဒေါသဖြစ်နေတာတွေကို ထိန်းချုပ်ပေးနိုင်ပါတယ်။
၇။ မကြာခဏဆိုသလို ခါးကိုက်ခါးနာဖြစ်တတ်သူတွေ၊ ဇက်ကြောတက်နေသူတွေ၊ ခါးမှာ ဒဏ်ဖြစ်ထားသူတွေအတွက်လည်း နာကျင်မှုဝေဒနာကို သက်သာစေပြီး အရိုးဒဏ်ကို ကုသပေးတဲ့နေရာမှာလည်း ကူညီပေးနိုင်ပါတယ်။
၈။ လူသိနည်းတဲ့ ကောင်းကျိုးတစ်ခုကတော့ Tension Headache လို့ခေါ်တဲ့ ပြင်းပြင်းထန်ထန် ခေါင်းကိုက်တဲ့ ဝေဒနာတွေ၊ စိတ်ဖိစီးမှုကြောင့်ဖြစ်စေတဲ့ ခေါင်းကိုက်ခြင်းဝေဒနာတွေကို သက်သာစေပြီး ခန္ဓာကိုယ်တစ်ခုလုံးက တင်းမာနေတာတွေကို ပြေလျော့ပေးပါတယ်။
အကြောလျှော့ဖို့ ဘာတွေသိထားဖို့လိုမလဲ။
- လေ့ကျင့်ခန်းမစတင်ခင် အနည်းဆုံး နာရီဝက်၊ တစ်နာရီလောက်ခြားပြီး အစာစားထားပါ။
- လေ့ကျင့်ခန်းစလုပ်တော့မယ်ဆိုရင် အကြောစလျှော့ပါ။
- ကိုယ်သိထားတဲ့ ပုံစံအတိုင်း အကြောလျှော့နိုင်သလို၊ တခြားသူတွေကိုလည်း အကြောလျှော့တဲ့နေရာမှာလည်း ဝိုင်းကူညီပေးဖို့ အကူအညီတောင်းနိုင်ပါတယ်။
- အကြောလျှော့တာဟာ ၅ မိနစ်ကနေ ၁၀ မိနစ်အတွင်းဆိုရင် လုံလောက်ပါတယ်။
- လေ့ကျင့်ခန်းမလုပ်ခင်မှာ အကြောလျှော့တာတစ်ကြိမ်၊ လေ့ကျင့်ခန်းလုပ်ပြီး တစ်ကြိမ် အကြောလျှော့သင့်ပါတယ်။
- အကြောလျှော့ပြီးတာနဲ့ ရေအဝသောက်ပြီး ကိုယ်လက်လှုပ်ရှားမှုကို စတင်ပါ၊ သွေးပူနေတဲ့အချိန်ဟာ ကိုယ်လက်လှုပ်ရှားမှုလုပ်ဖို့နဲ့ ကယ်လိုရီလောင်ကျွမ်းဖို့ အကောင်းဆုံးအချိန်ဖြစ်ပါတယ်။
- အကယ်လို့ ကိုယ်က လေ့ကျင့်ခန်းမလုပ်ဘဲ ရိုးရိုးအကြောလျှော့တာဆိုရင် ၅ မိနစ်လောက် ကောင်းကောင်းအကြောလျှော့ပေးရင် လုံလောက်ပါတယ်။
- လေ့ကျင့်ခန်းမလုပ်တဲ့နေ့၊ Gym မသွားတဲ့နေ့တွေဆိုရင် ကိုယ့်အိမ်မှာပဲ အကြောလျှော့ပေးနိုင်ပါတယ်။
- ယောဂလေ့ကျင့်ခန်းဟာ အကြောလျှော့ဖို့အတွက် အကောင်းဆုံးလေ့ကျင့်ခန်းပါပဲ။
ရဲမျိုးမြတ်